व्हालेंटाईन डे…भाग ३

त्या भेटीनंतर रंगा आणि अपूर्वा मध्ये एक कम्फर्ट झोन निर्माण झाला. त्याचा चांगला परिणाम ओफिसातील कामात दिसू लागला. अपूर्वा मुळात हुशार होतीच. तिला श्रीरंग ला जास्त ओळखू लागल्यावर एक वेगळा आत्मविश्वास मिळाला. तिने घेतेलेल्या निर्णयांच किंवा सूचनांच श्रीरंग ने कौतुक केल्यावर तिला कामाचा आणखी हुरूप येऊ लागला. तिने ओफिसातील अनेक प्रोसेस फाईन ट्यून केल्या. क्लायंट साठी TAT खूप इम्पृव्ह केला. एकुणात सबंध डिसेंबर महिन्यात अपुर्वाने ऑफिसात चांगले बदल घडवले ज्यातून एफिशियन्सी वाढायला, को ओर्डीनेशन वाढायला मदत झाली. ३१ डिसेंबर हा श्रीरंग चा वाढदिवस. त्यातच त्यांच्या फर्म ला ऑफिशियली सुरु होऊन डिसेंबर मध्ये २५ वर्ष पूर्ण झाली. ह्या निमित्ताने श्रीरंग ने स्टाफ, फ्रेंड्स आणि क्लायंट साठी न्यू इयर कम वाढदिवस कम बिझनेस ची सिल्व्हर ज्युबिली अशी दणदणीत पार्टी द्यायचा निर्णय घेतला. पार्टीची सगळी जबादारी अपूर्वा ने स्वतःच्या अंगावर घेतली. सगळी invitation, rsvp, क्लब बरोबर कोओर्डीनेशन तिने सांभाळल. बोलावणे करायला तिने दिग्या ला फोन केला.

दिग्या- हेलो…

अपूर्वा- हेलो. पटवर्धन सर का?

दिग्या- हो बोलतोय. कोण बोलतंय.

अपूर्वा- सर मी अपूर्वा बोलते आहे.

दिग्या- कोण अपूर्वा?

अपूर्वा- सर मी गद्रे अँड देव असोसिएट मधून बोलते आहे. श्रीरंग सरांच्या तर्फे तुम्हाला invite करायचं आहे.

कोण बोलते आहे हे लक्षात आल्यावर दिग्या ने एकदम सूर बदलला.

दिग्या- ओह…मग अप्पू बोलते आहे म्हण की. ते गद्रे अँड देव असोसिएट काय आहे? तू मध्या ची साली ना? म्हणजे आमची पण सालीच की. आणि साली आधी घरवाली असते.

स्वतःच्या ह्या फ्लर्ट कम विनोदावर दिग्या स्वतःच जोरजोरात हसला. अपूर्वाच्या मात्र तो थोडा डोक्यात गेला. ती काहीच बोलली नाही. फोनवर काही सेकंद सायलेन्स होता. शेवटी दिग्याच बोलला.

दिग्या- हेलो…हेलो…आहेस की गेलीस अप्पू?

अपूर्वा- आहे मी सर…तुमचा विनोद संपला असेल तर कामच बोलू का?

दिग्या- ए अप्पू सर काय म्हणतेस मला? मी काही तुझा बॉस रंगा नाहीये मला सर वगैरे म्हणायला. तू मला दिग्या म्हण प्लीज. We are friends अप्पू…

अपूर्वा- मी फोन तुम्हाला पार्टीसाठी इन्व्हाईट करायला केलाय. ३१ डिसेंबर ला रात्री क्लब मध्ये श्रीरंग सर पार्टी देणार आहेत.

दिग्या- ती तो दर वर्षी देतो. त्याचा वाढदिवस असतो त्या दिवशी. पण यंदा क्लब मध्ये देतोय म्हणजे काहीतरी मोठा मटका लागलेला दिसतोय त्याला.

अपूर्वा- त्यांचा वाढदिवस तर आहेच. पण न्यू इयर्स पण आहे आणि मुख्य म्हणजे आमच्या फर्म ची सिल्व्हर ज्युबिली आहे. म्हणून मोठी पार्टी देणार आहेत सर. तुम्ही नक्की यायचं आहे विथ family. आठ वाजता पोहोचा क्लब मध्ये. तुम्ही किती लोक येणार आहात ते मला कळवा प्लीज. त्यानुसार ऑर्डर देता येईल.

दिग्या- कुठे कळवू तुला? तुझा नंबर नाहीये माझ्याकडे.

आता ह्याला नंबर द्यावा लागणार हे लक्षात येऊन अपूर्वा ने जीभ चावली.

दिग्या- हेलो…अप्पू तुझा नंबर देऊन ठेव. मी संध्याकाळ पर्यंत सांगतो.

अपुर्वाने नाईलाजाने आपला नंबर त्याला दिला. बाकी इतरांना पण निमंत्रण देऊन ती कामाला लागली. श्रीरंग आज दिल्लीला गेला होता. संध्याकाळी अप्पू ऑफिसातून निघाली. तिने संध्याकाळचा स्पिनिंग क्लास लावला होता. ऑफिस मधून ती थेट तिथेच जायची हल्ली. आजही ती क्लासला गेली. Bag, फोन वगैरे सगळ लॉकर मध्ये ठेऊन स्पिनिंग करायला गेली. हा क्लास जॉईन केल्यापासून तिला खूप हेल्दी आणि हलक वाटू लागल होत. भरपूर वेळ स्पिनिंग करून घाम गळून शावर घेऊन कपडे बदलून अप्पू ने लॉकर मधून bag आणि फोन घेऊन रिक्षा पकडून घराकडे निघाली. फोन च डेटा नेटवर्क चालू केल्याबरोबर धाड धाड दहा मेसेज येऊन आदळले. सगळे मेसेज दिग्याचे होते. पार्टीला मी एकटाच येईन. You will have to look after me पासून पुण आवडलं का? अमुक रेस्तोरंत ला गेलीस का? आपण एकदा जाऊ पर्यंत फुल on पटवा पटवीचे मेसेज होते. ते वाचून अपूर्वाला हसू आल. त्या नंतर पार्टीच्या दिवसांपर्यंत दिग्या ने मेसेज चा भडीमार केला होता. फेसबुकवर तिला फ्रेंड रिक्वेस्ट पाठवली होती. दोन तीन वेळा मुद्दाम मध्या च्या घरी जाऊन तिला भेटला होता. अपूर्वा शांतपणे त्याची गंमत बघत होती.

शेवटी ३१ डिसेंबर आला. ऑफिस स्टाफ ला आज हाफ डे दिला होता. सगळे आपापल्या घरी जाऊन तयार होऊन श्रीरंग सरांच्या पार्टीला येणार होते. अपूर्वा काम करत होती. श्रीरंग केबिन मधून बाहेर आला. घरी निघाला होता. अपूर्वला अजून ऑफिसात पाहून आश्चर्याने म्हणाला-

श्रीरंग- अपूर्वा तू अजून इथेच? घरी जा. चेंज कर आणि पार्टी ला ये.

अपूर्वा- नाही सर. सत्यम फूड्स चा ओडीट रिपोर्ट आज पाठवायचा आहे. तो वेळेवर जायला हवा.

श्रीरंग- तो रिपोर्ट माझ्याकडून delay झालाय. मी बोलू का त्याचे md कुलकर्णींशी?

अपूर्वा- नको सर. आजची डेड लाईन आहे आणि रिपोर्ट आजच जाईल. आपल्याकडून delay नको. तुम्ही जा. मी direct येते. चेंज करायला वेळ नाही मिळणार मला.

श्रीरंग- पण अपूर्वा…

अपूर्वा- ह्या सध्या ड्रेस मध्ये चांगली नाही का दिसत मी?

श्रीरंग- नाही. मला तस नव्हत म्हणायचं…पण पार्टी आहे म्हणजे…सोड…तू ऐकणार नाहीस. आहेस तशी छान दिसते आहेस. अशीच ये. No problem.

अपूर्वा- thank you sir.

श्रीरंग घरी गेला. अपूर्वा कामात गढून गेली.

संध्याकाळी क्लब मध्ये श्रीरंग चे अनेक नवे जुने क्लायंट, फ्रेंड्स, कलीग्स, पुण्यातील काही आमदार, नगर सेवक, एक मंत्री वगैरे मंडळी जमू लागली होती. अपूर्वा ऑफिस मध्ये बसून तिच्या कलीग्स बरोबर आणि क्लब च्या manager बरोबर सगळ को ओर्डीनेट करत होती. श्रीरंग तिची वाट बघत होता. दिग्या पण तिलाच शोधात होता. ती ऑफिसात मेल सेंड करून सिस्टीम बंद करत होती. इतक्यात श्रीरंग चा फोन आला.

श्रीरंग- कुठे आहेस अपूर्वा? सगळे गेस्ट आलेत.

अपूर्वा- सर वीस मिनिटात पोहोचते. निघतच आहे.

श्रीरंग- लवकर ये.

श्रीरंग चा फोन कट झाला आणि दिग्याचा फोन आला.

दिग्या- अपु कुठे आहेस तू? मी क्लब मध्ये आलोय. पण दिसत नाहीयेस.

अपूर्वा- सर मी अजून आले नाहीये.

दिग्या- काय? आम्हाला इथे बोलावून तूच आली नाहीस? ए मला जाम बोअर होईल हा. तू प्रोमीस केल आहेस की मला कंपनी देशील म्हणून.

अपूर्वा- हो सर. मी येतेच आहे. ठेऊ?

दिग्या- लवकर ये यार.

अपूर्वा लगबगीने ऑफिसच्या बाथरूम मध्ये चेंज करायला गेली.

इथे पार्टी रंगात आली होती. गेस्ट श्रीरंग ला गिफ्ट देत होते. शुभेच्छा देत होते. बार ओपेन झाला होता. थंडी भरपूर होती. काही लोक पूल साईड ला आणि काही आत होते. श्रीरंग अपूर्वाची वाट बघत होता. ती आल्याशिवाय तो केक कापणार नव्हता. इतक्यात अपूर्वा आली. आज तिने साडी नेसली होती. हलका मेक अप. मोकळे सोडलेले केस. ती आल्यावर अनेक पुरुषांच्या नजरा तिच्यावर खिळून ती जात असलेल्या दिशेला त्यांच्या माना वळत होत्या. अपुर्वाने त्याला ती साध्याच ड्रेस मध्ये येणार आहे हे सांगितल्याच श्रीरंग ला आठवल. आणि आता तिला सुंदर साडी नेसून आपल्या दिशेने येताना पाहून श्रीरंगला ती एकदम हाय स्पीड (स्लो मोशन) मध्ये त्याच्या दिशेने येते आहे. बाकी कोणीच तिथे नाहीये अस काहीतरी वाटल आणि तितक्यात ती त्याच्या पुढ्यात होती. तिने हात पुढे करत श्रीरंगशी हस्तांदोलन केल आणि त्याला गिफ्ट दिल. मग त्याला मिठी मारून त्याच्या कानात happy birthday sir अस पुटपुटली आणि दूर झाली. श्रीरंग मात्र तिच्या इतक्या समीपच्या स्पर्शाने, तिच्या परफ्युम च्या वासाने काही क्षण हरवून गेला. आणि इतक्यात दिग्या चा आवाज आला आणि श्रीरंग भानावर आला.

दिग्या- हाय अप्पू? किती वेळ? कुठे होतीस? गेस्ट ना अस ताटकळत ठेऊ नये. Come have a drink. It’s too cold.

अपूर्वा- सर मी थोड्या वेळाने घेते. आताच आले आहे. जरा सगळ्या गेस्ट ना भेटते.

दिग्या- सगळ्या गेस्ट ना? तू मला प्रोमीस केल आहेस ना? मग मला भेट. बाकीच्यांना हा रंगा entertain करेल. काय रंगा?

इतक्यात मध्या, त्याची बायको, उत्तम आणि त्याची बायको तिथे आले. मध्याच्या बायकोने मुद्द्दाम विचारलं.

मध्याची बायको- काय दिगंबर भावोजी वहिनींना आणल नाही का पार्टीला?

दिग्या- मी कोण आणणार तिला? तिची ती हुशार आहे. तिला काहीतरी काम होत म्हणून नाही आली. मी साईट वरून डायरेक्ट आलो.

मध्या- दिग्या तू आमच्या अपूर्वाला म्हणे गुड मोर्निंग, गुड नाईट संदेश पाठवतोस रोज.

दिग्या मंझा हुवा खिलाडी होता. अनेक बायकांना पटवण्याचा अनुभव त्याच्याकडे होता. काही वेळा पकडला देखील गेला होता. प्रकरण दोघांच्या घरापर्यंत गेली होती. त्यामुळे त्याला अश्या डायरेक्ट प्रश्नांनी काहीच फरक पडत नसे. त्याची लफडी ओपनली केलेली होती. त्यामुळे पकडला गेलो तर वगैरे भीती त्याला अजिबात नव्हती. तो शांतपणे म्हणाला-

दिग्या- म्हणजे काय? तिचा दिवस आणि रात्र दोन्ही चांगले जावे अस मला मनापासून वाटत आणि त्यासाठीच मी तिला दिवस रात्र शुभेच्छा देतो.

उत्तम- दिग्या सुधारणार नाहीस ना तू? अरे किमान मध्या च्या सालीला तर सोड.

दिग्या- साली आधी घरवाली असते. मग तिला का सोडायचं. हे तर मी अपु ला पण सांगितल आहे. हो की नाही अप्पू?

अपूर्वा ने फक्त एक स्माईल केल. श्रीरंग ला मात्र दिग्याचा जाम राग येत होता. खर तर त्याची गरज नव्हती. त्याने ह्या आधी अनेक बायकांना पटवलं होत. त्याची रसभरीत वर्णन श्रीरंग ने ऐकली होती. पण त्याला त्याचा राग कधीच आला नव्हता. फक्त दिग्याची काळजी वाटली होती की कधी अडकला तर बाराच्या भावात जाईल अशी. पण आज त्याची चिडचिड होत होती.

दिग्या- अपु…चल ना यार..बार वाट बघतोय. मग डान्स फ्लोर पण आहे. लेट्स गो.

अपूर्वा- सर तुम्ही काय म्हणालात मित्राची साली तुमची पण आधी घरवाली. बरोबर ना?

दिग्या- of cours.

अपूर्वाने आपला हात त्याच्या पुढे धरला. दिग्याने आनंदाने तिचा हात आपल्या हातात घेतला आणि सर्वांकडे विजयी नजरेने पाहिलं. श्रीरंग ला संताप अनावर होत होता.

अपूर्वा- (दिग्याला) सर, मी जीजूंना भाऊ मानते. मग त्याच नात्याने भावाचा मित्र म्हणजे माझाही भाऊ झाला ना? म्हणुनच आज आपल हे नात दृढ करायला मी राखी घेऊन आले आहे तुमच्यासाठी. सर्वांच्या समक्ष बांधते. सध्या सिझन नसल्याने खूप शोधावी लागली. पण तुळशी बागेत मिळाली एकदाची. जरा महाग पडली. पण दादासाठी थोडी काय मी खूप महाग राखी पण घेऊ शकते.

दिग्याला काही कळायच्या आत तिने त्याच्या मनगटावर राखी बांधली सुद्धा. हे पाहून दिग्या सकट सगळे चक्रावून गेले. फक्त अपूर्वा काय चीज आहे हे पूर्ण माहित असलेले मध्या आणि त्याची बायको मात्र गालातल्या गालात हसत होते. अपूर्वने दिग्या चा हात धरला आणि म्हणाली-

अपूर्वा- तुम्हाला मी सर म्हटलेलं आवडत नाही ना? मग तुमच्या इच्छेचा मान राखत आजपासून मी तुम्हाला सर नाही दादा म्हणणार आहे. दादा जाउया ना? बार बोलावतो आहे. थंडी खूप आहे. डान्स फ्लोर आपल्याला खुणावतो आहे.

अपूर्वा पूर्ण भंजाळलेल्या दिग्याला हाताला धरून घेऊन गेली. श्रीरंग सुन्न होता. इतक्यात मध्याची बायको म्हणाली-

मध्याची बायको- रंगा भावजी अशी आहे आमची अप्पू. कोणी जरा वाकड्यात गेला किंवा गळ्यात पडायचा प्रयत्न केला की थेट राखी बांधते. त्या उपर जर तो सुधारला नाही तर मुस्काट रंगवते.

मध्याच्या बायकोच हे वाक्य रंगाच्या मानावार आणि मेंदूवर कोरलं गेल. तो बार कडे बघत होता. अपूर्वा आणि दिग्या ड्रिंक घेत होते. अपूर्वा उत्साहाने काहीतरी सांगत होती आणि दिग्या खांदे पाडून बोर होत ते ऐकत होता. पुढे केक कापून झाला. बारा वाजून गेल्यावर न्यू इयर शुभेच्छा देऊन झाल्या. सगळी मंडळी आपापल्या घरी गेली.

रात्री घरी गेल्यावर श्रीरंग एक एक गिफ्ट उघडून बघत होता. त्याच वेळी त्याच लक्ष अपूर्वा ने दिलेल्या गिफ्ट वर गेल. त्याने गिफ्ट उघडून पाहिलं. त्यात एक कलोन ची १०० मिली ची बाटली होती आणि एक चिठ्ठी होती. तो चिठ्ठी वाचू लागला.

चिठ्ठी- सर, तुम्हाला वाढदिवसाच्या खूप खूप शुभेच्छा. तुमच्या…नाही आपल्या फार्म ला पंचवीस वर्ष झाली त्यासाठी पण तुम्हाला शुभेच्छा. गेल्या काही महिन्यात तुमच्याकडून खूप शिकायला मिळाल आणि पुढेही शिकणार आहे. मला आपल्या फर्म मध्ये कामाची संधी दिल्याबद्दल तुमचे आभार. सर मला ना तुम्ही एखाद्या यशस्वी योद्ध्या सारखे वाटता. Confident, caring, successful, forgiving, matured, intelligent…and yes good looking पण. सॉरी तुमच्या रुपाबद्दल पर्सनल कॉमेंट करते आहे. पण सर मला जे वाटतं ते मनापासून लिहिते आहे. तर अश्या यशस्वी योद्ध्याला साजेसा फ्रेग्रंस तुम्हाला गिफ्ट करते आहे. आशा आहे तुम्हाला तो आवडेल. नाही आवडला तरी अजिबात राग नाही. फ्रेग्रंस ही अत्यंत खाजगी बाब आहे. पण तुम्हाला जे कलोन दिल आहे त्याचा फ्रेग्रंस मला यशस्वी योध्याचा वावतो म्हणून तुम्हाला दिला आहे. काही जास्त बोलले असेन तर सॉरी. अपूर्वा…

श्रीरंग ने ते कलोन उघडून थोड आपल्या मनगटावर उडवून त्याचा वास घेतला. त्याला तो वास कम्माल आवडला. मग त्याला अपूर्वा ने दिग्याला राखी बांधली तो प्रसंग आठवून हसू आलं आणि नंतर मध्याच्या बायकोने जे सांगितल ते पण आठवल. सगळ्या गिफ्ट उघडून, बघून श्रीरंग झोपी गेला.

दुसर्या दिवशी श्रीरंग ऑफिसला आला. महत्वाचे कॉल, on line मिटिंग वगैरे संपवून त्याने अपूर्वाला एका क्लायंटची फाईल घेऊन आत बोलावलं. ती यायच्या आधी मोबाईल च्या सेल्फी कॅमेरा मध्ये स्वतःला न्याहाळल. इतक्यात अपूर्वा आली.

अपूर्वा- हेलो सर…

श्रीरंग- हाय अपूर्वा…thanks for the lovely gift.

अपूर्वा- आवडलं सर तुम्हाला?

श्रीरंग- yes.

अपूर्वा- चला बर झाल. मला भीती होती की आवडेल की नाही. कारण सर फ्रेग्रंस ही खूप वैयक्तिक गोष्ट आहे ना.

श्रीरंग- हो. पण आवड सारखी असू शकते ना? तू काल मारलेलं परफ्युम पण मला आवडलं.

श्रीरंग हे बोलून गेला आणि त्याच्या लक्षात आल की तो काय बोलून गेलाय. अपूर्वा ने देखील त्याच्याकडे चमकून पाहिलं. काही सेकंद ओक्वर्द पॉज. मग घसा खाकरत श्रीरंग म्हणाला-

श्रीरंग- हा जरा ती फाईल बघू.

अपूर्वने त्याला फाईल दिली आणि ती समोर ताटकळत उभी राहिली. श्रीरंग फाईल मधले पेपर्स बघत होता. त्याने वर न बघता हातानेच अपूर्वला इथे ये अशी खूण केली. अपूर्वा जाऊन त्याच्या खुर्चीच्या मागे उभी राहून फाईल बघू लागली. ती जरा खाली वाकल्यावर तिला श्रीरंगच्या कलोनचा वास आला. तेच जे तिने काल त्याला गिफ्ट केल होत. इतक्यात श्रीरंग म्हणाला-

श्रीरंग- ही डेप्रिसिएशन ची फिगर चूक आहे. जरा चेक कर परत एकदा.

अपूर्वा- हो सर. बघते. सर तुम्ही मी गिफ्ट दिलेलं कलोन मारलं आहे?

श्रीरंग- ह..हो…मी म्हणालो ना मला आवडलं म्हणून?

अपूर्वा- सर तुम्हाला खूप सूट करत ते. Thanks.

इतक बोलून अपूर्वा जाऊ लागली. श्रीरंग ने त्याच्या laptop मध्ये डोकं घातलं आणि तो नकळत काल झोपताना ऐकलेलं गाण गुणगुणू लागला. “रोज रोज आंखो तले”….ते ऐकून दाराजवळ गेलेली अपूर्वा वळून परत येत म्हणाली-

अपूर्वा- सर तुम्ही चक्क आरडी च गाण गाताय?

श्रीरंग- हो…काल झोपताना ऐकत होतो. फार सुदिंग गाणी आहेत काही. हे त्यातलच एक.

अपूर्वा- आणि मी कुमार गंधर्व ऐकते आहे काही दिवस. अमेझिंग आहेत ते.

श्रीरंग- हम्म…बर मला एक सांग…तू आमच्या दिग्या ला चक्क राखी बांधलीस काल? कमाल आयडीया होती ती. कस काय सुचल तुला?

अपूर्वा- सर, दिगंबर दादा चांगले आहेत. पण नजर वाईट आहे त्यांची. आणि मला तर लगेच कळते नजर. मी एकटी आहे म्हणजे अव्हेलेबल आहे अस नाही ना होत? मी जोवर चांगली आहे तोवर चांगली आहे. मला एकटी समजून पण कोणी चान्स मारायचा, गळ्यात पडायचा, सहानुभूती दाखवायचा, मैत्री किंवा हक्क सांगायचा प्रयत्न केला तर अश्या लोकांना मी माझ्या स्टाईने सरळ करते. आधी राखी आणि नाही सुधारला तर लाठी असा साधा हिसाब आहे माझा.

इतक बोलून अपूर्वा केबिन मधून निघून गेली. तिच्या पाठमोऱ्या आकर्षक आकृतीकडे बघत हरवलेल्या श्रीरंग ला कोणीतरी जोरात कानफटात मारली. गाल चोळत त्याने पाहिलं तर त्याच्या समोर अपूर्वा रागाने थरथरत उभी होती. तिच्या हातात राखी होती.

अपूर्वा- हात…

श्रीरंग ने हात पुढे केला. तिने त्याच्या हाताला राखी बांधली आणि म्हणाली-

अपूर्वा- माझ्या पाठीला पण डोळे आहेत. बघण सोडा, माझ्या बद्दल मनात वाईट विचार जरी आला ह्यापुढे तर माझ्याशी गाठ आहे. कामाशी काम ठेवा सर. लाईन क्रोस करू नका.

इतक त्याला सुनावून ती तरातरा निघून गेली. ती गेल्यावर श्रीरंग ने रागाने तिने बांधलेली राखी काढून टेबल वर टाकली. इतक्यात त्याला विजय प्यून चा आवाज आला.

विजय- सर घड्याळ का टाकल टेबल वर. अहो तुटेल ना ते.

ते ऐकून श्रीरंग भानावर आला. समोर विजय चहा चा ट्रे घेऊन उभा होता. श्रीरंग ने आपल्या हाताकडे आणि टेबल वर पाहिलं. राखी कुठेच नव्हती. त्याच घड्याळ मात्र टेबल बर पाडलेल होत. थोडक्यात अपूर्वा ने त्याला राखी बांधली हा त्याला झालेला भास होता. पण श्रीरंग ने त्याचा धसका मात्र घेतला होता. विजय ने ठेवलेला चहा सिप करत त्याने मोबाईल मध्ये आर डी हिट्स लावले. नेमक जे गाण लागल ते होत “सच मेरे यार है, बस वोही प्यार है, जिसके बदले में कोई तो प्यार दे…बाकी बेकार है…यार मेरे” (©मंदार जोग)

क्रमश:व्हालेंटाईन डे…भाग ४